حلقة الكوميديا السوداء: وفاء موريس لغسان اسطفان
حلقة الكوميديا السوداء !؟ ..
في حلقة Sarcasm Show على شاشة ال OTV امس سهرنا سهرة فرح وحزن !.. فرح مع موريس موصللي الفنان بكل انواع الفن ( مسرح،تلفزيون واذاعة ) التاريخيي ، والاجتماعيي والرومانسيي والتراجيديي .
بمسرح الطفولي كان الطفل الاكبر المتفوق بتوجيه الاطفال، والمرشد الاكبر بالدور التربوي والثقافي والاجتماعي والنفسي يللي بنّمي شخصية الطفل وبيغرس بفكرو المرح والقيم الوطنية باسلوب تهريجي شيق وراقي، ما حدن قدر لحد اليوم يتخطى موريس بهل المضمار .
ومن جو مرح سيطر على اجواء الحلقة وبعد سؤال لمقدم البرنامج عن اصدقاء وزملاء موريس يللي رحلو ، تجّهم وجو وبقي مبتسم كعادتو ولكن بسمتو كانت مجبولي بحزن دفين وجاوب : ” منن غسان اسطفان بس غسان ما رحل ..! بعدو بقلبي، و بقلب كتار من يللي بحبوه .. وكرسة القعدة معو صارت فاضيه .” موريس كان وجو عم يضحك بس ضحكتو كانت حزبني كانها عم تذكرو بايام الحلوي يللي عاشها بجانب غسان كصديق وزميل ” عشرة عمر ” كان عم يبتسم تيخبي دمعتو ، وبكي من جوا وبكاّنا معو . بالاخص لما اخذ التلفون بايدو وطلب خط :” الو وينك يا غسان ؟ اكيد فوق .. انا موريس عم احكي معك من تحت ايه موريس موصللي ما غيرو .. ايه بعدني لهلء صامد تحت وانشالله منلتقي بس مش قريبا ، لانو عندي كم شغلي بخلصها وبطلع لعندك اذا الله راد .. كيف الشباب عندك ؟ ايه يللي سبقونا ؟ كيف انطوان غندور عم تتسللو سوا ؟ ” .
هون بكلامو كتب موريس قصة آلامو وعبّر بعمق عن احساسو ع فراق غسان وانطوان غندور ، وبتعابيرو خللانا نحس انو عم يروي “كوميديا سودا” .
يا موريس بل الجلسات معك عادة كنت تضّحكنا ، شو عملت فينا اليوم؟ ما تصورنا الحزن رح يعمل فيك هيك ع صديق ، خلليتنا نحس كأنك خسرت جزء من موريس ، عم تضحك وتبكي ؟ ونحنا كنا عم نبكي بدون ما نضحك .
اجمل كلمة قلتها لغسان ” اشتقتلك يا غسان ” .
الله يرحمو ويطول بعمرك يا مبدع
يا احلى موريس ..
جان خالد
11/10/02026
