حوار بالعامية “شو بتحب تكون, زعيم أو حكيم ؟؟”
فقرات أسبوعية يكتبها الإعلامي جلال فيتروني
ممكن نروح لبعيد بخياراتنا ولكن بالنهاية انت يلي بتحدد موقعك وصفتك وتقييم الناس لشخصك
حبينا اليوم بفقرة حوار بالعامية نقدم عدة خيارات ممكن تكون لصالح الشأن العام وممكن تكون للمصلحة الشخصية والمنفعة الذاتية بس
لهيك أيها المواطن اللبناني جربت الزعما والسياسين اكتشفت ثغراتون ووعودون ومعزوفة الإنماء المتوازن حتى صار غير متوازن
بتحب تكون تصريحاتك بتخالف مواقفك بالموسم الانتخابي بتزور الناس وبعدها الخط مسكر النايب مسافر برات البلد وعند طلب الخدمات من المواطنين بقول لحالو الهريبة تلتين المراجل بدك تكون زعيم يقولولك سعادتك وفخامتك والقلب معك والروح بترخصلك نحنا معك عالوعد أصواتنا إلك ما بتنرد وعند المصلحة الوطنية والصالح العام….. ما إلي علاقة
الفساد بتعتبرو متل حبة البونبون وما بتاكل إلا سمك وجومبون انت بوادي المشاهير والباقي عندك مساطير
بتحب تكون حكيم بعقلك بإرادتك بفكرك بتدرس بمعاهد الرقي العام وبتمشي بأمور حياتك بانتظام وبتقدر زوجتك بكل إحترام
بتحترم قوانين السير وبتريد الخير للغير بتعطي الحقوق لأصحابا وما بتطرد الناس من بوابا
حكيم ما بيتآمر على الآخرين بيكون للمحتاج معين تجاه أهلو بالخدمة ايديه مش مقصرين
حكيم بأقوالك بأفعالك مش بكترة أموالك ولا على جمالك
بتسعد القلب الحزين وبتفرش أرض الحياة بالرياحين
انت وحدك بي هالصفات بتحصل على كل النياشين بتقلي وين بعدك؟؟
بقلك الإختيار مبدأ أساسي بالحياة و ومن خلال مسيرتك بتحدد نقاط فشلك أو نجاحك
انا بترك الخيار إلك يا مواطن دايما نقي الأصلح بين الخيارات المتشعبة
عنوان الفقرة القادمة من (حوار بالعامية) = أمراض بدنا علاج لبناني
