ذكرى رحيل الفنانة شيرين سيف النصر وأهم محطاتها الفنية
ذكرى رحيل شيرين سيف النصر.. نجمة التسعينات اللي سابت بصمة ومشيت في هدوء
في يوم 13 أبريل 2024، رحلت عن عالمنا الفنانة شيرين سيف النصر، والنهاردة بنحيي الذكرى التانية لرحيلها، بعد ما سابت وراها تاريخ فني مميز في السينما والتليفزيون.
شيرين كانت واحدة من أبرز نجمات التسعينات، وقدمت أعمال كتير متنوعة، وبدأت مشوارها من بدري بمشاركتها في مسلسل “ألف ليلة وليلة” سنة 1986، وبعدها توالت أعمالها في الدراما زي “غاضبون وغاضبات” و”مين اللي ما يحبش فاطمة” و”المال والبنون”، واللي حققوا نجاح كبير وقتها ولسه عايشين في ذاكرة الجمهور.
وفي السينما، شاركت في أفلام مهمة زي “سواق الهانم” و”النوم في العسل”، وقررت تعتزل التمثيل في نهاية 1996 بعد جوازها، لكنها رجعت تاني للفن سنة 2001 بعد الانفصال، وقدمت بعدها أعمال من أبرزها فيلم “أمير الظلام” مع عادل إمام سنة 2002.
على المستوى الشخصي، اتجوزت شيرين أكتر من مرة، أولهم رجل الأعمال السعودي عبد العزيز الإبراهيم، وبعدها عاشت قصة حب مع الفنان مدحت صالح واتجوزوا لفترة قصيرة ما كملتش 4 شهور، وفي 2010 اتجوزت من دكتور التجميل رائف الفقي لكن الجواز انتهى كمان بالانفصال.
آخر أعمالها في الدراما كان مسلسل “أصعب قرار” بمشاركة عدد كبير من النجوم زي أحمد بدير ورياض الخولي، أما آخر ظهور سينمائي فكان في “أمير الظلام”.
شيرين سيف النصر رحلت في هدوء يوم 13 أبريل 2024، ووصّت إن العزاء يكون بسيط وعند المقابر بس، زي ما عاشت دايمًا بهدوء وبعيد عن الأضواء.
عن صفحة السيد البشلاوي
