حوار بالعامية “الرشوة سوقها ماشي وحقوق البشر للتلاشي”
فقرات أسبوعية يكتبها الإعلامي جلال فيتروني
الرشوة سوقها ماشي وحقوق البشر للتلاشي
اليوم موضوعنا مهم ومتل ما عودناكم إنو نواكب ونضوي عامجريات الأحداث الإجتماعية والسياسية والأمنية وحنضل مستمرين معكون لحتى نكون كلمة حق بوج سلطان جاير
اليوم بلبنان تغيرت المعادلات وانقلبت المفاهيم أصحاب النفوذ والتسلط السياسي ساقو بالبلد نحو التسيب والانهيار المهم تتعبى الجيبة ويصيب اللبنانيين الخيبة
اليوم اي معاملة بدوائر الدولة في لازمة بيتبعوها بتقول مد ايدك عاجيبتك وادعمني وخلي عملتك ترن هيديك الرنة وإلا…
معاملتك بتصير بالدرج وبتنام وبيبعد عنها الفرج
عداك عن تزوير الملفات وعقود بيع مزيفة لعدة أشخاص واستيلاء على أراضي من شبيحة تابعين لفلان وعلان ومشكلة الأمن المهتز بمناطقنا اللبنانية
لذلك صارت الرشوة متل المي للعطشان منسعى من خلالها لاستغلال الإنسان وصرنا فرجة لمين ما كان
مفهوم العدالة والحق انلغى من قاموسنا وعلى الدنيا السلام
لهيك الغرايب والعجايب عم تحصل بلبنان ونحن منقول بلدي سائر بالسطوع عفوا (ملطوع) من جميع الميلات
حتى جلسات المحاكمات والدعاوى القضائية مضيعة العنوان ما في جلسات ولا مين يسأل لمن ختمنا عناون مقالنا انو حقوق البشر للتلاشي اكيد منعني انو اذا مات القضاء العادل مشيت سياسة المحادل وكتبولك بالقلم العريض اوع تناضل
بس نحنا منقلون النضال مستمر وما بينتهي عندكون حيضل الصوت يودي لو كتمتو أما الصدى فعال بكل الاتجاهات وما بيقدر حدا يلغي حدا
وما بين الرشوة والتزوير والفساد حكاية ألم عشناها ودقنا متاهاتها حتى صار الكلام يتحدى ويحكي… (بدنا أفق جديد ومسؤولين جديرين)
