نشرة صوتنا للمدى الفنية – 17 نوفمبر
الصورة الأولى لسيارة أبو جانتي اللانسر الشهيرة،
حيث بدأ تصوير المسلسل في دمشق، بمشاركة أبطاله الأساسيين من بينهم سامر_المصري، سامية_الجزائري، أيمن_رضا، شكران_مرتجى وغيرهم.
يذكر أن العمل من إخراج زهير_قنوع، وإنتاج شركة ورد للإنتاج الفني.
عن صفحة فن_هابط_عالي

الدكتور والمخرج المسرحي السوري عجاج سليم برفقة الفنان أسعد فضة ويعلق: “الكبير أسعد فضة”.
عن صفحة فن_هابط_عالي

الفنانة يارا صبري تنضم إلى
مسلسل ما اختلفنا الكوميدي الجزء الرابع.
عن صفحة فن_هابط_عالي

الفنان معتصم النهار يحصد جائزة الفنان الأكثر أناقة ضمن حفل “EMIGALA 2026” في دبي..احتفاءً بأسلوبه المميز وحضوره في عالم الموضة، إلى جانب أعماله الفنية.
عن صفحة فن_هابط_عالي

صانعي المحتوى سارة الورع و غيث مروان يحتفلان بمرور شهر على ولادة ابنها ريان.
عن صفحة فن_هابط_عالي







حكاوي البشلاوي كاميليا والرحلة الأخيرة.. حكاية صورة قبل الإقلاع
في الساعات الأولى من فجر 31 أغسطس 1950، كانت الفنانة كاميليا في مطار فاروق بالقاهرة، بتستعد للسفر. وبحسب رواية «دار الهلال»، كان مصوّر مجلة «المصور» بيصوّر ركاب الرحلة، ولما كاميليا شافته ابتسمت له، فالتقط لها واحدة من آخر صورها قبل الإقلاع.
بعد الإقلاع بدقائق، سقطت الطيارة في محافظة البحيرة، ورحلت كاميليا مع باقي ركاب الرحلة وطاقمها.
الصورة المتداولة مع الحكاية دي من لقطات كاميليا الأرشيفية، وتحديد مكان التقاطها وإن كانت هي نفس لقطة المطار اللي وصفتها «دار الهلال» لسه محتاج توثيق.
حكاوي البشلاوي كاميليا السينما المصرية صور نادرة

حكاوي البشلاوي العمدة سليمان غانم ونازك هانم السلحدار.. يا سلام على ليالي الحلمية!
عمدة الدراما المصرية والعربية صلاح السعدني بالطربوش والجلابية، وبجنبه صفية العمري بأناقة نازك هانم. لقطة واحدة ترجعنا لـ«ليالي الحلمية»، وتخلّينا نفتكر المناكفات اللي كانت تبدأ بنظرة من نازك وردّ من العمدة!
حكاوي البشلاوي العمدة صلاح السعدني صفية العمري ليالي_الحلمية

“المحترم رفيع بيه”… جملة اتقالت في مسلسل وبقت لقب عايش مع صاحبها حتى بعد ما رحل عن دنيتنا
في فنانين بنفتكرهم بأدوارهم وفي فنانين بنفتكرهم بأخلاقهم قبل أدوارهم وممدوح عبد العليم كان من النوع اللي جمع الاتنين وخلّى اسمه مرتبط دايما بالرقي والاحترام.
حكايتنا النهارده عن فنان دخل قلوب الناس من وهو طفل وكبر قدام عيونهم لحد ما بقى واحد من أهم نجوم الدراما المصرية.
ممدوح عبد العليم اتولد يوم 10 نوفمبر سنة 1956 في قرية سنتريس بمحافظة المنوفية وكان من صغره عنده موهبة مختلفة وحب كبير للتمثيل… بدأ مشواره وهو لسه طفل في برامج الأطفال بالإذاعة والتلفزيون لحد ما اكتشفه المخرج نور الدمرداش وقدمه في مسلسل الجنة العذراء مع الفنانة كريمة مختار.
ومن الحاجات اللي فاكرها عن ممدوح إني لما شوفت المسلسل ده في الإعادة وكان بالأبيض والأسود اتعرفت على ممدوح عبد العليم الطفل واكتشفت قد إيه كان موهوب من صغره وكان عنده قدرة غريبة إنه يوصّل الإحساس للمشاهد رغم سنه الصغير.
والجميل إنه رغم حبه للفن ما أهملش دراسته وكمل تعليمه لحد ما حصل على بكالوريوس الاقتصاد والعلوم السياسية وفضل الفن موجود في حياته لحد ما قرر يتفرغ له تماما.
ومع بداية الثمانينيات بدأ مشواره الفني بشكل أكبر ولفت الأنظار بسرعة خصوصا بعد مشاركته في فيلم العذراء والشعر الأبيض مع نبيلة عبيد ومحمود عبد العزيز وشريهان.
ومن هنا بدأت رحلة فنية مليانة أدوار مختلفة وكل دور كان بيكشف عن موهبة جديدة جواه.
شفناه في فيلم البريء مع أحمد زكي وشفناه في بطل من ورق بشخصية رامي قشوع اللي خلتنا نضحك ونحبه وشفناه في كتيبة الإعدام وسمع هس والحرافيش ورومانتيكا.
وفي التلفزيون كان له حضور من نوع تاني تماما.
مين فينا ينسى علي البدري في ليالي الحلمية أو ينسى أداءه في خالتي صفية والدير؟
لكن يفضل رفيع بيه العزايزي في مسلسل الضوء الشارد من أكتر الشخصيات اللي ارتبط اسمه بيها.
شخصية فيها الهيبة والقوة والجدية وكان ممدوح قادر يخليك تصدق الشخصية من أول مشهد لآخر مشهد لدرجة إن ناس كتير فضلت تناديه رفيع بيه حتى بعد انتهاء المسلسل.
والغريب إن لقب المحترم اللي ارتبط برفيع بيه ماكانش مجرد لقب لشخصية قدمها على الشاشة لكنه كان قريب جدا من الصورة اللي عرفها عنه زملاؤه وكل اللي اتعاملوا معاه.
ممدوح كان فنان بيحسب خطواته كويس وماكانش بيجري ورا كثرة الأعمال ولا مساحة الدور وكان بيختار اللي يحس إنه يستحق يقدمه للناس… وكان مثقفا ومحب للقراءة والمسرح الإنجليزي والسينما العالمية وعنده شغف بالأعمال اللي فيها قيمة ومعنى.
حتى إنه كان بيحلم يقدم رواية واحة الغروب لبهاء طاهر على الشاشة من شدة إعجابه بيها.
وقدر خلال مشواره يحصل على جوائز وتكريمات كتير منها جائزة عن فيلم قهوة المواردي وجائزة عن فيلم الخادمة وتكريم مهرجان الإسكندرية السينمائي عن فيلم رومانتيكا.
أما بعيد عن الكاميرات فكانت حياته فيها حكاية حب وبيت وأسرة.
اتجوز في بداية حياته من الفنانة نبيلة كرم لكن الزواج ما استمرش وبعدها جمعته حكاية حب بالإعلامية شافكي المنيري واللي كانت شريكة حياته لحد آخر يوم في عمره.
وربنا رزقهم ببنتهم الوحيدة هنا وكان متعلق بيها جدا وكانت أغلى حاجة في حياته… ومن الحاجات الجميلة اللي اتحكت عنه إنه كان بار بأهله جدا وفضل محافظ على ذكراهم وبيزور قبورهم حتى بعد رحيلهم… وكانت شافكي بتحكي عنه إنه في بيته كان إنسان هادي ومحترم وصاحب أصول وإن الصورة اللي الناس شافتها في رفيع بيه كان فيها حاجات كتير من شخصيته الحقيقية.
لكن الحكاية اللي كانت الناس فاكرة إنها هتستمر سنين طويلة انتهت فجأة…. في يوم 5 يناير سنة 2016 كان ممدوح بيمارس الرياضة في نادي الجزيرة وفجأة تعرض لأزمة قلبية رحل على أثرها عن عمر 59 سنة.
رحل من غير مقدمات وساب وراه زوجة وبنت وجمهور كان لسه مستني منه أعمال كتير.
وبعد رحيله كتبت شافكي المنيري كتاب بعنوان أيام في بيت المحترم وكأنها كانت بتحاول تحتفظ بين صفحاته بذكريات إنسان عاش معاها سنين وكان بالنسبة لها زوجا وأبا وصاحب عمر.
وهنا يمكن نفهم إن لقب المحترم ماكانش مجرد كلمة اتقالت في مسلسل وخلصت بانتهاء مشاهده لكنه بقى جزء من السيرة اللي فضلت وراه… ممدوح عبد العليم ماكانش من الفنانين اللي اعتمدوا على كثرة الظهور عشان يفضلوا في ذاكرة الناس لكنه قدم أدوارا قليلة أو كتيرة كل واحد منها كان له مكانه وقيمته.
والعبرة من حكايته إن الإنسان مش بيتقاس بعدد السنين اللي عاشها ولا بعدد الأعمال اللي قدمها لكن بيتقاس باللي سابه في قلوب الناس وبالسيرة اللي بتفضل تتقال عنه بعد ما يمشي.
ممكن العمر ينتهي في لحظة لكن الاحترام والمحبة والذكرى الطيبة ممكن يفضلوا سنين طويلة.
ربنا يرحم الفنان ممدوح عبد العليم ويغفر له ويجعل كل عمل جميل قدمه في ميزان حسناته
وفي النهاية يمكن أجمل حاجة نقدر نسيبها بعدنا مش شهرة ولا مال ولا منصب لكن سيرة حلوة تخلي الناس تفتكرنا بالخير وتدعي لنا من قلبها.
تحية لكل إنسان اختار يعيش محترم ويسيب وراه ذكرى تستاهل إنها تعيش بعده
مها القناوى
حكايات مها

تعرفوا إن سهير رمزي عاشت 13 سنة فاكرة إن أبوها واحد تاني خالص؟
والحقيقة اللي عرفتها بعد كده قلبت حياتها كلها…
للي يعيش يومين… يشوف عجايب! سهير رمزي.
كان يا ما كان… في الزمن الجميل، في بورسعيد، مدينة البحر والنسمة المالحة، اتولدت بنت هادية في صوتها بس نار في قلبها… اسمها الحقيقي سهير محمد عبدالسلام نوح.
أمها كانت الفنانة الكبيرة درية أحمد… الست اللي تقدر تقول عليها مدرسة الدفى والضحكة الحلوة، اللي ربت بنتها بحب زيادة عن اللزوم…. بس الحكاية… ما كانتش سهلة خالص.
أم سهير اتطلقت من أبوها وهي حامل فيها. وما لحقتش الدنيا تدوّر… إلا وكانت اتجوزت سيد زيادة راجل من بره الوسط الفني، بس اتعامل مع سهير كأنها بنته فعلاً.
كبرت البنت وهي فاكرة إن سيد هو أبوها، واسمها بقى سهير زيادة وأولاده هما إخواتها… وعاشت 13 سنة كاملة وهي متطمنة إن العيلة واحدة ومفيهاش غموض.
لحد ما جه يوم… اتغيّر فيه كل حاجة.
كانت بتروح المدرسة، يدّوها وصل المصاريف باسم سهير عبدالسلام… ترجع تسأل أمها، تقولها: “ولا يهمك يا سهير… دي غلطة من الموظف وخلاص!
والبنت تصدّق… لأنها كانت شايفة ماما الكل في الكل… والأب الوحيد اللي تعرفه هو بابا سيد.
لكن لما أمها قررت تنفصل عن سيد بعد 13 سنة… هنا ما بقاش ينفع السكوت…. في لحظة صعبة… وهي بتلم هدومها عشان تنتقل من مصر الجديدة لبورسعيد، بصّت لبنتها وقالتلها الحقيقة: “يا سهير… ده مش أبوكي… أبوكي الحقيقي اسمه محمد عبدالسلام”.
وقتها… الدنيا وقفت عند البنت.
قالت بعدها: كنت حاسة إني غريبة… ولا فاهمة حاجة… بس كمان كنت حاسة إني اتسرقت مني سنين… واتكتبلي اسم مش بتاعي”.
ورغم إن أبوها الحقيقي رجع يعيش معاهم سنة… إلا إن العلاقة ما كملتش، لأنه كان صعب في طبعه… وما استحملوش بعض… واتطلقوا تاني بعد سنة.
أما الفن… فكان دايماً بيناديها.
أول ظهور ليها كان وهي عندها 6 سنين في فيلم صحيفة سوابق، وبعدها اختفت شوية، اشتغلت مضيفة طيران وعارضة أزياء… بس السينما كانت عشقها الأول والأخير، فقررت ترجع بقوة وهي في سن 19 سنة من خلال فيلم الناس اللي جوه وبعدها ميرامار ومن هنا انطلقت… في أدوار كتير، منها الإغراء.
بس رغم الشهرة… كان في جواها صوت بيقولها: “هو أنا مين؟… واسمي إيه؟… وحقي في الدنيا دي إيه؟”
لحد ما قابلت المنتج حسن رمزي صديق أمها، اللي اقترح عليها اسمها السينمائي: “سهير رمزي
وافقت البنت… لأنها كانت رافضة اسم أبوها الحقيقي “عبدالسلام” عشان ما يزعّلش أبوها اللي رباها، وفي نفس الوقت كانت رافضة “زيادة” لأنه مش من حقها بعد الطلاق…فالاسم الجديد كان طوق نجاة… وهوية جديدة من غير جرح لحد.
وفي وسط كل ده… كانت عندها العِند… الصفة اللي خلتها تقول:
“أنا مش عايزة أخلف… عشان جسمي ما يبوظش… وما أضيعش وقتي في الحمل والبيت… وما حدش يشاركني حب أمي”.
وعاندت السنين… لحد ما فات قطار الإنجاب.. بس ندمت بعد كدا للأسف بعد ما فاتها المعاد..
وفي التسعينات قررت تعتزل الفن ولبست الحجاب، وبعدها رجعت تمثل بالحجاب في حبيب الروح (2006)، وفضلت بعيدة عن الأضواء بس قريبة من قلوب الناس.
زينب والعرش…. للي يعيش يومين… يشوف عجايب!
العبرة: الهوية مش ورقة… الهوية حضن صادق وحقيقة في وقتها.
وساعات الصدمة… بتوجع، بس بتفوق… وبتدي
مها القناوى
حكايات مها





