ناس بسمنة وناس بزيت والبوصلة مضيعة البيت
حكومة تصريف أعمال آمنت بالمسلمات التزمت اتفاق الطائف فشلت بمعالجة الملفات ويا سنين عمري سكين التشبيح فيني فات
من وقت الكورونا لهلق الأزمات عاملة معنا مرافقة السياسيين استغلو الوضع طلبو الفحوصات للمواطنين واخدوا منها نسبة شاركو عمدا بمنع الناس من مزاولة اعمالا بحجة انتقال العدوى ما فكروا ساعة وحدة كيف المواطن بدو يكسب عيشو بأصعب ظرف عم بيمر فيه لبنان ومع قمع المخالفات صارت المعيشة بدون تأمين البديل أمر من غيرا
ناس بتقبض مخصصات من دون ما تشتغل وناس بتسبح بحمد الزعيم إلهي يا خالق الكون الفسيح وزعيمي كتير منيح ومطرح ما بتروح بالقلب كبير
أما مصير اهل الشمال وطرابلس فمتروك لقدرون والرسائل ما بتوقف عيش بالعتمة ليصير وجك متل الفحمة ونغلي عليك سعرالرغيف لترجعلنا خفيف نضيف مكسور خاطرك والفقر قاهرك
طرابلس صارت للمحظوظين زبانية السلطة زقف للفساد وخدلك قرشين وخليك ناطر معتاز الباب
بوصلة الإنماء وين صارت ليش ما وصلت لعنا او اخدوها شليفة والنية عفيفة وين تطبيق الامركزية الإدارية وضمان الشيخوخة وين أصحاب المليارات يلي بيتذكرو طرابلس بس بالموسم الانتخابي وبعدها بيقول مينك انت ما بعرفك
صرنا عم نعاني من تمييز عنصري وتفاوت طبقي وهولي معنا وهولي ضدنا رموا الوطن ورا ضهرون وغنيو لولد ولدون
بدنا خطة اصلاحية انمائيةتغير هالوضع من أساسو بعدين لكل حادث حديث
