لك عيب عليكون استحوا… ممنوع الفقير يموت غرقاً في طرابلس، لو كلب غرق كنتوا تحركتوا أسرع من هيك… مش مسموح الفقير يموت غرقاً بسبب تقصير البلديات والنواب
ليش الفقير ما ألو صوت، لأن ما ألو ضهر!!! كل يومين تلاتة في حالة غرق وشباب عم تموت في طرابلس وما حدى حرّك ساكن
من شهر الى اليوم، كم شاب قضى غرفاً في طرابلس؟ مين أحصاهم؟! مين شخّص هل ظاهرة؟! مين فكّر فيهون؟! بعيلهم؟ بأهليهم؟
حدى بيعرف ليش عم بموتوا غرفاً؟ هل مسموح انو شباب البلد (بمقتبل العمر) يموتوا هيك من دون ما نفكّر ليش هيك عم بصير؟! …
الفقير من حقو يعيش متلو متل الغني ومن حقو يسبح بشكل آمن أسوةً بجميع المدن الساحلية في لبنان
يعني معقول تكون طرابلس من شمالها الى جنوبها على البحر، كيلومترااااات على البحر، ومافي شاطئ شعبي آمن ومرتّب ومجاني؟!
مدينة ساحلية بأكملها، أقرب شاطئ لها بعيد ٢٠ كم عنها، ليش يعني؟!
مدينة ساحلية بأكملها، والفقير بدو يدفع ١٠٠$ تينزّل عيلتو عل بحر؟ ليش يعني؟!
هيدا حق مكتسب للشعب اللبناني عموماً وللطرابلسي خصوصاً، استعمال الأملاك البحرية، حق يكفله القانون
*** المطلوب: توفير مساحة آمنة و نظيفة تسمح للعامة بالنزول الى البحر دون التعرض للغرق او الابتزاز او التلوث (متنفس عائلي طبيعي في أيام الحر اذا ما عندكم مانع طبعاً)
*** مطلوب تأهيل شاطئ آمن يتضمن مركز للمنقذين ( ممكن من المتطوعين) وبشكل مضبوط وراقي ومحترم يحاكي قيمة الانسان الطرابلسي وقيمه
*** من هنا نطالب البلدية / اتحاد البلديات / النواب بشاطئ للعموم
متل مسبح عمشيت، كفرعبيدا، حالات، الصفرا، صيدا، صور، والرملة البيضاء
تكلفة هذا الشاطئ تكاد تكون لا تذكر بالمقارنة مع منافعه، مش شحادة! لأ هيدا مطلب مستحق والفقير عم يدفع رسوم البلدية متلو متل الغني
- الشاطئ موجود
- الرمل موجود
- الشتول موجودة
- رصف الأرصفة مقدور عليها
- التصاميم تركوها علينا، نحن نتكفل بها
- باقي شوية تجميل وارصفة وتمديدات وادارة كويسة
وما حدى احسن من حدى
ممكن يصير عندنا بكل شواطئ لبنان
بس بدها شوية حس بالمسؤولية
Dr. Badih Matar الدكتور بديع مطر
