غسان الخوري يفضح فشل القوات بالكهرباء
رد نائب رئيس التيار الوطني الحر للشؤون الإدارية غسان الخوري على ما جاء في بيان للنائب السابق عماد واكيم، فكتب على “إكس”:
بزمن المحلّ، القوات عم تنفض الغبار عن وجوه غابت سنين، وعم تستنجد بكل صوت جاهز يشتّم ليغطّي على فشلها المزمن بملف الطاقة وبغيره.
بس الوقائع أوضح من كل محاولات التضليل:
١) على أيّام التيار، التغذية وصلت فوق ٢٠ ساعة، وحتى بعد الأزمة الاقتصادية سلّمنا الوزارة على ١١ ساعة.
اليوم؟ ساعتين لا غير!!
علماً ان الوزارة وقتها كانت محاصرة، ومشاريعها ممنوعة من التنفيذ، أمّا اليوم، الوزارة محاطة بدعم داخلي وخارجي غير مسبوق…
والنتيجة انهيار شامل بالتغذية والمشاريع.
هيدا مش ظرف… هيدا فشل إداري كامل.
وأضاف الخوري:
٢) استلمتوا تعرفة مصحّحة بتغطي الكلفة وبتأمّن أرباح.
شو عملتوا فيها؟
طفّيتوا المعامل، وتباهيتوا إنكن ما عم تطلبوا مال من الخزينة…
بينما حمّلتوا الناس فاتورة مولّدات بلا رقابة، بلا ضوابط، وبلا أي حسّ بالمسؤولية.
هيدا مش إصلاح… هيدا تخلّي عن واجبات الدولة.
٣) استلمتوا ٦٠٠ مليون دولار بين حساب كهرباء لبنان والفواتير المستحقة.
بدّدتوا المصاري، وصرتوا عاجزين تشتروا محروقات لتشغيل المعامل.
وآخر “إنجازاتكن”: تفريغ بواخر بلا تدقيق بالمواصفات…
وبعدها بتحكوا عن إدارة ورقابة؟
هيدا نموذج عن سوء إدارة ما بيتخبّى.
وتابع الخوري:
٤) عقد المحروقات مع العراق، يلّي كان يوفّر الفيول ويدفع داخل لبنان، لغيتوه…
واليوم عم تركضوا لتعيدوا الاتفاق نفسه.
يعني لا رؤية، لا بديل، ولا حتى قدرة على الحفاظ على مكسب قائم.
والنتيجة سياسة تخبيص كلّفت اللبنانيين مليار ونص دولار بالسنة وما زالت عم تزيد الأعباء يوميًا.
هيدا من دون ما نحكي بالعجز بتأمين الماي للناس وتنفيذ مشاريع الطاقة المتجددة والصرف الصحي و…
وبعد كل هيدا، عم تهدّدوا بملفات القضاء حسمها وطلعت فاضية… متل وعودكن، متل خططكن، متل إدارتكن.
وختم الخوري: الإنجازات واضحة، والأرقام بتحكي، والناس بتعرف:
لما توصلوا لتحقيق حاجات الناس بملف الكهرباء، وغيرو، ساعتها احكوا.
ومن هلق لوقتها… تواضعوا، لأن بعدكن لا عارفين شو بدكن ولا شو فيكن تعملوا.
