نشرة صوتنا للمدى الفنية – 11 سبتمبر
وليد توفيق وقصة تعرفه على ملكة جمال الكون جورجينا رزق
سنة 1974، وليد توفيق شاف جورجينا رزق لأول مرة بالصدفة على متن طائرة متجهة لمصر، وكان وقتها لسه في بداية مشواره الفني.
أول ما طلع الطيارة، لقى سجادة حمرا وورد واستقبال كبير، فافتكر إن كل ده عشانه، خصوصًا إنها كانت أول زيارة ليه لمصر. لكن بعدها سمع المضيفات بيقولوا: «الملكة وصلت».. ليكتشف إن اللي راكبة معاه هي جورجينا رزق، ملكة جمال الكون سنة 1971.
المنتج حسين الصباح شجعه يروح يسلم عليها، لكن وليد اتردد وقال إنه كان وقتها لسه «غلبان». ولما وصلوا مطار القاهرة، شاف الفرق بنفسه.. الصحافة كلها كانت مستنية جورجينا، بينما هو تقريبًا محدش كان واخد باله منه.
مرت السنين، وجورجينا تزوجت علي حسن سلامة وأنجبت ابنها علي، وبعد وفاته ابتعدت عن الأضواء وركزت على تربية ابنها.
وفي وقت لاحق، بعد ما أصبح وليد اسم معروف في الفن، عُرض عليه فيلم مع جورجينا، فسافر إلى باريس لمقابلتها. وهناك كانت المفاجأة؛ كان متخيل إنها عايشة حياة فخمة، لكنه وجدها في شقة بسيطة مع ابنها، وكانت أصلًا مش مهتمة ترجع للسينما وفضلت تركز على ابنها.
اللقاء ده غيّر نظرة وليد ليها، وبعد فترة اتقابلوا تاني، لحد ما تحولت الصداقة بينهما إلى قصة حب.
بحسب رواية وليد، العلاقة بدأت بشكل جدي في باريس ثم تطورت، وبعدها عاشا معًا فترة زواج عرفي استمرت حوالي 7 سنين، قبل ما يعلنا زواجهما رسميًا سنة 1991.
وخلال السنوات دي، ما كانتش جورجينا مجرد زوجة وليد، لكنه كمان اعتبر ابنها علي واحد من عيلته، بينما فضلت هي بعيدة عن الأضواء رغم العروض اللي كانت بتوصلها.
واللافت إن قصة حبهم بدأت بمشهد بسيط جدًا.. وليد، الشاب اللي كان متردد حتى يروح يسلم على ملكة جمال الكون، انتهى بيه الحال إنه يتزوجها ويكمل معاها لسنين طويلة
عن صفحة كل النجوم
أعلن المنتج السوري عبدو مدخنة عن انضمام الفنان عباس النوري إلى فريق عمله القادم، تأليف سامر رضوان، بينما تتولى فيه المخرجة رشا_شربتجي دفة الإخراج.
يذكر أن الفنان عباس شارك العام الماضي في مسلسل مطبخ_المدينة للمخرجة رشا شربتجي.
عن صفحة فن_هابط_عالي
الإعلامية السورية هبة حيدري تفوز بجائزة أفضل إعلامية عربية، في مهرجان الفضائيات العربية بمصر.
عن صفحة فن_هابط_عالي
النجمة سهير رمزي ضحت بالزواج من أجل الفن
في سنة 1976، فوجئ الجمهور بالنجمة سهير رمزي في مجموعة مشاهد جريئة جداً ضمن أحداث فيلم “المذنبون”، المشاهد دي ما مرتش بسلام، بل تسببت في زلزال سينما وسياسي وصل لحد قبة البرلمان المصري
الواقعة كانت الأولى من نوعها في تاريخ الرقابة؛ بقرار شديد وحاسم من رئيس الجمهورية وقتها أنور السادات، تم منع الفيلم من العرض في سينما ريفولي بالقاهرة، وإحالة مديرة الرقابة اعتدال ممتاز وموظفين تانيين للمحاكمة التأديبية بتهمة التسامح مع فيلم بيشوه صورة المجتمع المصري، وانتهت الأزمة وإقالتها فوراً من منصبها!
سهير رمزي اعترفت بعد سنين برجوعها وندمها، وقالت إن المخرج صورها بشكل جريء، لكنها عادت وأكدت إنها كانت مقتنعة بالعمل وفي بداية حياتها وشايفاه من علامات السينما المصرية.
لكن النجومية في الفيلم ده كان لها تمن غالي جداً؛ سهير دفعت تمن إصرارها على البطولة طلاقها الرسمي من زوجها اللي طلب منها ترفض الفيلم لكنها أصرت على موقفها وضحت بالجوازة عشان الفن!
ورغم كل الجدل، بيعتبر النقاد “المذنبون” واحد من أهم أفلام السينما لجرأته في كشف الفساد، بمشاركة نخبة من العمالقة زي حسين فهمي، عماد حمدي، صلاح ذو الفقار، عادل أدهم، ويوسف شعبان.
وبعيداً عن الشاشة، عاشت سهير رمزي محطات إنسانية صادمة؛ أعلنت ندمها الشديد في سنواتها الأخيرة على عدم الإنجاب رغم زيجاتها الكتيرة، وقالت بكل شجاعة: “كنت أنانية جداً وحبيت سهير رمزي أكتر من إني أخلف طفل يعطلني عن شغلي، ودلوقتي زعلانة إنه ما فيش حد جنبي”.
ومن أغرب مواقفها الإنسانية، كان رفضها التام لاستلام ميراث والدها بعد وفاته! صرحت سهير إنها ما عاشتش معاه وما شافتوش غير مرة واحدة في حياتها بسبب انفصاله عن والدتها، وعشان كده قررت تتنازل عن نصيبها بالكامل لأخواتها الصغار لتجهيز أختها الصغيرة للجواز، مؤكدة إنهم أحق بالفلوس دي منها.
رحلة سهير رمزي مليانة بالتقلبات والقرارات الجريئة اللي جعلت منها واحدة من أكثر النجمات جدلاً في تاريخ الفن العربي
عن صفحة مواقف وطرائف
نجمة كلنا بنحبها.. إنها الجميلة سميرة توفيق
هنتكلم عن نجمة ليها مكانة خاصة في قلوبنا كلنا.. الجميلة سميرة توفيق، واحدة من آخر نجوم الزمن الجميل اللي لسه بينا، ربنا يحفظها ويمتعها بالصحة والعافية ويبارك في عمرها.
سميرة توفيق مش مجرد مطربة غنت أغاني حلوة، دي صوت له طابع خاص ومش شبه حد.. قدرت تتميز بلونها البدوي الجميل، وبقت واحدة من أهم الأصوات اللي ارتبط اسمها بالأغنية البدوية والطرب العربي الأصيل.
ولدت سميرة توفيق سنة 1935 في قرية أم حارتين بمحافظة السويداء في سوريا، ونشأت في أسرة لبنانية، وبدأ مشوارها الفني بدري، لحد ما قدرت تحفر اسمها وسط كبار نجوم الغناء في الوطن العربي.
وإحنا لما نفتكر سميرة توفيق، لازم نفتكر أغاني عاشت معانا ولسه بنسمعها لحد النهارده، زي «بسك تيجي حارتنا» و**«يا عين موليتين»**، وغيرها من الأغاني اللي خلت صوتها علامة مميزة في ذاكرة أجيال كتير.
يمكن الزمن اتغير، والأغاني اتغيرت، لكن صوت سميرة توفيق له حكاية تانية.. صوت فيه أصالة ودفء وريحة زمن جميل نفتقده دلوقتي.
كلنا بنحبك يا سميرة.. وربنا يديم عليكي الصحة والستر والعافية، وتفضلي دايمًا من أجمل ذكريات زمن الفن الجميل.
حكايات عن نجوم اتربينا على فنهم ولسه عايشين في قلوبنا
نعمت مختار.. نجمة اعتزلت وهي في عز المجد
اليوم هنتكلم عن فنانة يمكن ناس كتير من الأجيال الجديدة ما يعرفوهاش كويس، لكن زمان كانت واحدة من أشهر نجمات السينما المصرية.. الجميلة نعمت مختار.
نعمت مختار كانت حالة فنية مختلفة.. جمعت بين التمثيل والرقص الشرقي، وقدرت تسيب بصمة واضحة في سينما الستينات والسبعينات، وشاركت في أكتر من 46 فيلمًا و4 مسلسلات.
ومن أهم أعمالها أفلام زي «بين القصرين» و**«ثرثرة فوق النيل»** و**«المرأة التي غلبت الشيطان»**، وقدرت من خلال أدوارها تثبت إنها مش مجرد راقصة بتظهر على الشاشة، لكن فنانة عندها حضور وموهبة وقدرة على الأداء.
ورغم إن بعض المخرجين حاولوا يحصروها في نوع معين من الأدوار، إلا إنها قدرت تثبت نفسها وتبقى واحدة من أشهر نجمات جيلها.
وكانت كوكب الشرق أم كلثوم معجبة بفنها، ووصفَتها بأنها «سيمفونية الرقص الشرقي»، كما كان الموسيقار فريد الأطرش حريصًا على وجودها معاه في حفلاته.
لكن زي ما بيحصل مع نجوم كتير، شهرتها ما كانتش بعيدة عن الجدل، ومن أشهر الوقائع اللي اتنشرت عنها وقتها ما ذكرته مجلة «الشبكة» سنة 1967، عن ظهورها وهي بترقص مرتدية مصحفًا ذهبيًا على صدرها، وهو ما أثار وقتها انتقادات وجدلاً واسعًا.
والأغرب والأهم في حكاية نعمت مختار، إنها في سنة 1974 أخدت قرار مفاجئ جدًا…
اعتزلت الفن وهي في قمة شهرتها ومجدها!
قررت تبعد عن الأضواء، وتعيش حياتها بعيد عن الشهرة والكاميرات، وكأنها قالت إن مش كل اللي وصل للقمة لازم يفضل متعلق بيها.
ومهما طال غيابها عن الشاشة، فضل اسم نعمت مختار موجود في ذاكرة جمهور الزمن الجميل، كواحدة من الفنانات اللي كان ليهم حضور خاص ومختلف.
كل الدعوات للفنانة نعمت مختار بالصحة والعافية وراحة البال، وتفضل دايمًا حكاية من حكايات الزمن الجميل.
حكاوي البشلاوي.. بنفتكر نجوم زمان، مش بس عشان فنهم، لكن عشان الحكايات اللي سابوها وراهم
عن صفحة السيد البشلاوي
سمير صبري.. واجه الإشاعات بحسن الخلق
في حياة كل فنان حكايات كتير، لكن حكاية سمير صبري مع الخاتم اللي فضل في إيده حوالي 40 سنة، كانت من الحكايات اللي بتكشف جانب مختلف من شخصية الفنان بعيدًا عن الأضواء والشهرة.
سمير صبري كان دايمًا لابس خاتم في إيده، ومش بيخلعه إلا للضرورة، وبعدها يرجع يلبسه تاني بسرعة.
الخاتم كان عليه لفظ الجلالة «الله»، وكان له مكانة خاصة جدًا عنده، لأن قصته بدأت في مكان مقدس، أثناء أدائه مناسك العمرة في الحرم المكي.
بيحكي سمير صبري إنه كان قاعد لوحده قدام الكعبة، مستني صلاة الفجر، ومش بيتكلم مع حد، وفجأة قرب منه رجل كبير في السن، وقطع لحظة الصمت دي بطريقة عمره ما نسيها.
كان سمير وقتها بيتأمل الكعبة، وفجأة الرجل أهداه الخاتم.
ومن اللحظة دي، الخاتم بقى جزء من حياته، وفضل محتفظ بيه ويرتديه لمدة أربعة عقود تقريبًا.
وفي لقاء تلفزيوني قبل رحيله، حكى سمير صبري القصة، وقال إنه لو خلع الخاتم لأي سبب، كان بيدور عليه بسرعة ويرجع يلبسه.
والجميل في حكاية سمير صبري إن الإنسان أحيانًا بيكون عنده حاجات بسيطة في شكلها، لكن قيمتها عنده أكبر بكتير من تمنها.. لأنها مرتبطة بذكرى، أو موقف، أو شخص، أو لحظة عمرها ما بتتكرر.
سمير صبري رحل عن عالمنا، لكن فضل في ذاكرة الناس بفنه وأخلاقه وحضوره، وفضلت معاه حكايات كتير بتكشف لنا الإنسان اللي كان ورا الفنان.
رحم الله الفنان الكبير سمير صبري وجعل سيرته الطيبة وفنه الجميل باقيين في قلوب محبيه. 🌹ك
مش بس بنحكي عن نجوم زمان، إحنا بنحكي عن الإنسان اللي كان جوا كل نجم
عن صفحة السيد البشلاوي
حكاوي البشلاوي 🎙️ | عبدالحليم حافظ يحكي وجع عمره 💔
عبدالحليم حافظ.. المطرب اللي أسعد الملايين بصوته، كان جواه وجع قديم ما فارقوش طول حياته.
كان بيحكي عن أقسى لحظة في عمره:
«أنا اتولدت من غير ما أشوف أمي.. والدتي توفت وهي بتولدني، وعشت طول عمري محروم من حضنها.»
يمكن عشان كده كان صوته دايمًا فيه حاجة من الحزن.. إحساس عميق يخليك تحس إن اللي بيغني مش بس بيغني، ده بيحكي وجع عاشه بنفسه.
وصحيت على العذاب.. لقيت الفرح غاب
والحب يا عيني داب..
اتاري الزمان كداب. 💔
عبدالحليم ماكانش مجرد صوت جميل.. كان حكاية إنسان عاش الحرمان، وحوّل وجعه لأغاني عاشت في قلوب الملايين
عن صفحة السيد البشلاوي
