فواز الخجا يكتب: طرابلس الفيحاء ليست مكباً للإهمال
الأستاذ فواز الخجا يطلق النفير انها مدينة الفيحاء وليست مكبا يتلقى الإهمال
بقلم الأستاذ فواز الخجا
الزبالة عم تعَبّي شوارع طرابلس، والناس عايشة بين الروائح والقرف… وين التظاهرات؟ وين وقفات الاحتجاج؟ وين الضغط الشعبي والمطالبة بالمحاسبة وفتح تحقيق قضائي بحق كل مين قصّر بهالملف؟
شو ناطرين؟ ينزلوا أعضاء الحكومة ومجلس الإنماء والإعمار من بيروت ليلمّوا زبالتنا؟ وين البلدية؟ وين المسؤولين؟ ووين صوت أهل المدينة؟
هلّق صارت القصة بدها «تروّي» وما بدها «شعبوية»، صح؟ المطالبة بحقّنا صارت شعبوية، بس السكوت عن الزبالة وتبييض وجّ المسؤولين صار حكمة!
طرابلس ضحية زعماء بيشتروا أصوات الناس، وضحية ثقافة الشحادة وتبييض الوجّ بدل المطالبة بالحقوق. وضحية سكوت قسم من أهلها، وعدم الثقة بالعمل الجماعي، وثقافة اللفّ والدوران بدل المواجهة والمحاسبة.
كرامتنا وصحّتنا مش منّة من حدا. بدنا تحرّك سلمي قدّام الجهات المسؤولة، وخطة واضحة لرفع النفايات، وتحقيق يحدّد المسؤوليات ويحاسب كل مقصّر. بكفّي ترقيع وأعذار… طرابلس مش مكبّ، وأهلها لازم يكون إلهم صوت!
