حوار بالعامية “انتخاب رئيس بظل حروب واصلة عالمريخ”
فقرات أسبوعية يكتبها الاعلامي جلال فيتروني
فجأة فاقو النواب وقررو ينتخبو رئيس والراعي الدولي يلي كامش أمور دول الشرق الأوسط هزلون بالعصا بكفي مهاترات لبنان أمام تحولات كبيرة ونقلات جديرة
الوضع بسوريا شعلان من كل الميلات واذا انسحب الدب الروسي من المعادلة يا سلام سلم على النظام الحاكم
أما تركيا كوعت على الطرف التاني وقالت نعم لمصالح العدو الإسرائيلي بالمنطقة
بعد راس السنة بدها تحصل مفاجئات وممكن نشهد تبدلات المشروع الأميريكي الصهيوني عم يتسوقلو بالشرق العربي والداعمين كتار ومنقول يا
ستار
الخروقات الإسرائيلية تجاه لبنان ما بتنتهي المطلوب تعزيز الإستراتيجية الدفاعية ونشر الجيش اللبناني على كامل الحدود الجنوبية وانسحاب العدو الإسرائيلي من الأماكن يلي احتلا
أما انتخاب رئيس للجمهورية اللبنانية هالشي لح يعزز قدرة لبنان على المواجهة عبر التعامل بحكمة مع كل التحديات يلي صايرة
إذا نجحوا النواب بانتخاب رئيس حيادي لا ينتمي لأي محور أو حزب طائفي فينا نقول مشينا على السكة الصحيحة
لعله وصول قائد الجيش اللبناني العماد جوزيف عون لسدة الرئاسة هو السبيل الوحيد لنطلع من هالجو المأزوم
وعلى قولة بيت هالشعر :
عشنا حروب وكروب
ما فيها الا صوت البارود
لازم يجي علينا يوم
نقدم لبعضنا ورود
المشاكل صار بدها حل
بكفي لازم نخلص من هالعل
بكرة بيستلم الرئيس
وبيروح الحظ التعيس
بتشرق شمس التفاؤل
ومن المحبة وجوها منتداول
