حوار مؤثر في البرزخ بين زياد وهلي الرحباني
حوار في البرزخ بين زياد وهلي
كيفك يا زياد؟كيفك يا خيي؟
مش منيح يا خيي..كيفك إنت ملا إنت؟
أنا كتير منيح..قضيت عمري كلو مرتاح ومبسوط لا هم ولا غم..طول عمري مش فارقة معي شي..
وانا متلك قضيت عمري مش فارقة معي شي..ولا بيهمني شي..بس رغم هيك كانت الناس محملتني مسؤولية أنا ما بدي ياها..مسؤولية الإسم الكبير وأنا آخر همي الإسم الكبير…كل اللي كنت إحلم فيه هو اني عيش على راسي..لا بدي إفهم حدا ولا بدي حدا يفهمني..انت نيالك..حصلت على اللي أنا ما قدرت حصلت عليه بالحياة يا خيي.. البعد عن الأضواء اللي بتعمي القلب قبل العيون.
القعدة حد فيروز بآخر إيام الصيفية، وبموسم العناب، ومع رجعة الشتوية بتسوا كل أضواء الدني…لما كانت تغنيلي : يا حلو يا حبيبي اللي ما ببيعك بالدني..كل سنة بحبك اكتر من سنة..هيدي لوحدها بكفة والدنيي كلها بكفة..يا خيي
بتعرف يا خيي..لما كنت عم شوف الناس بعزايي وهني عم يتوافدوا ويتنافسوا مين بدو يكون عم يظهر أكتر بمظهر المحب..الحزين..صدقت..انخدعت..موتك كشفلنا كل شي…يا خيي
لا يا خيي..انت نسيت شغلة كتير مهمة..انت مشهور..انا مش مشهور..ولما انت متت..الناس كانت مشتاقة لفيروز..لوجه فيروز..لحركات فيروز..لتصرفات فيروز…هلق خلص..هيدا الشوق انتهى…انا ما عطيتهم الوقت الكافي ت يرجعوا يشتاقوا لفيروز..يمكن لأني ما بعرف خطط…ويمكن لأني اشتقتلك..ما قدرت إصبر كتير وقت ت اجي لعندك…غمرني..غنيلي…بركي بنام شوي..يا خيي
شو بدك ياني غنيلك يا خيي…
غنيلي “سلملي عليه “
لا..هيدي الغنية بالذات ما بقدر غنيلك ياها..لأنو فيروز صرلا كذا يوم عم تغنيلك ياها..يا خيي
مش يمكن عم تغنيها إلك؟..يا خيي
إلي أو إلك مش فارقة…المهم إنها عم تغنيها..يا خيي
طيب غنيلي شي ع ذوقك يا خيي…
تكرم عيونك يا خيي..رح غنيلك :
“أمنلي بيت..مطرح منك ساكن..مش هم يكون طابق منو آمن..مشتاقة شوفك..لكن..لكن..معقول يضل قلبي معلق بالمناطق..؟والإيام تمرّ وشارع منو رايق؟…وموضوعي باقي عالق..عالق..آآآآه”
يسلم تمك يا خيي..
هيدا مش تمي اللي عم يغني..هيدا قلبي يا خيي..
يسلم تمك وقلبك..يلا أنا نعست وبدي نام..فيني نام على كتفك يا خيي؟
نام بقلبي يا خيي وخليك نايم للأبد..بس خلي مطرح لفيروز.
فيروز مطرحها محفوظ بقلوب الكل…تصبح على خير يا خيي.
وانت بألف خبر يا خيي.
عن صفحة ماهر عوض
