فقرات أسبوعية يكتبها الإعلامي جلال فيتروني
حوار بالعامية
1/1/2024
سنة مرقت وسنة طلت
سنة مرقت على لبنان عشنا فيها جنون الدولار وعصفورية الأحداث وشد حبال انتخابات رئاسة الجمهورية اللبنانية وتضخم مالي بزيادة طبع العملة وعيش يا دويك تا يتعمرلك بيت
تحية لروح فناننا الكبير عبد الله الحمصي (أسعد)
عام ودعنا بس حسينا حالنا ضعنا الألغام والمكر الصهيوني من ميلة والمطبات الأمريكية من ميلة ألله يساعدك يا لبنان يا أبو العيلة
سنة راحت غابت معها الآمال التوافق السياسي ما عاد إلو مجال بالمكر السياسي بيروح المربح والرسمال
سنة اختفت مشاعرها انتفت وطلت سنة الصراع العربي الإسرائيلي
بال ٢٠٢٣ عشنا وجع الفلسطينيين بغزة وبالعام الجديد حنعيش تفاصيل مرعبة
سلام إليك يا فلسطين من المسجد الأقصى لكنيسة المهد ولكل المقاومين
سنة طلعت من البال وبلشت سنة اقتصاد البلد بعدو لورا والمسؤولين اللبنانيين بيغنولك غنية ما بإيدي سامحني عاللي جرى
سنة وكنا نقول للأمل اللبناني قرب سكون معنا بس هوي رفض وقال ما بسكن مع الإهمال وجماعتو
سنين مرقو حوادث السير بالمئات لا إشارات ضوئية ولا إجراءات السلامة العامة طرقات لبنان من دون صيانة خدني عالنسيان
من لما طلع الدولار هالطلعة القوية ما عاد ينزل العم سام داعمو والمؤامرة الصهيونية ساندتو
٤ سنين مرقو فواتير المستشفيات زادت كتير المريض اللبناني عايش بجو تعتير معقولة صرنا بحاجة لعطف سفير او وزير
بلبنان مش حنخلص اليوم من سرد المعاناة بعد في خبريات بتبيض الوش عفوا ممكن تسود الوش وهيك صرنا ببلد الماوماو انا يلي بدي عيش بس ومن بعدي الطوفان
معقول يكون عام ٢٠٢٤ فرج وتغيير أو متل يلي قبلو شي تعتير
