حوار بالعامية “نفايات في كل مكان وعلى مر الليالي والأيام”
فقرات أسبوعية يكتبها الصحافي جلال فيتروني
بكل مرة بتوقع الجرة قبل كل مناسبة او عيد
مفيون إلا ما يحضرو مصيبة لطرابلس والشمال أو شي كارثة بيعتبرو طرابلس مكسر عصا وما فيها رجال تدافع عنها ترد عنها رمي الحصى
طرابلس يا جماعة عم تتعرض لأبشع حملة مهينة لكرامتا وثقافتا ونسيجا القومي والعربي ولمحو دورها المحوري بالشرق الأوسط
طرابلس يلي وقفت وناصرت القضية الفلسطينية ومنها انطلقت المسيرات والمظاهرات دعما للقضايا العربية
ممنوع ثم ممنوع وهيي على ابواب تتويجا عاصمة للثقافة العربية إنو يكون فيها نفايات مكدسة بالاطنان انو يكون فيها مجرور طايف يسرح ويمرح مع تراقص حتمي للقوارض والحشرات الضارة
وين بلديات طرابلس والمينا والبداوي وزارة الداخلية شو دورا
في شي أهم من متابعة أمور المواطن والأحياء الشعبية
السواح الأفاضل اذا اجو عامدينة طرابلس ومدينة المينا شو حيقولو
عذرا على التعبير حيقولو انها مدينة الفوضى والروائح والنفايات المنتشرة بكل مكان
كيف بدنا نستقبل فعاليات الدول العربية المعنية بالثقافة والحضارة والتراث الشرقي
بأي وجه بدنا نقابل سفراء الدول الغربية وشو منبرر حالة الكوارث الموجودة ببيئتنا
لهيك تحركو يا مسؤولين يا بلديات يا نواب مدينة طرابلس قبل ما توقع الفاس بالراس ويدقولنا الجراس
كل قلبنا من رؤية النفايات بدنا نشوف لبنان وطرابلس آية مشرقة بالنضافة واللياقة والجمال
نحنا عابواب شهر رمضان خلونا نستقبل هالشهر بقلوب نضيفة ونوايا سليمة ساعتها حتقول
طرابلس يا ست الكل
انت اسوارة مجوهرة
لما طيفك علينا يهل
منعيش حالة مفخرة
