فقرات أسبوعية يكتبها الاعلامي جلال فيتروني
بلد بدون انارة متل يلي ضايع ناطر البصارة
بيقول المتل زواجة وزوجناكي بس حظ منين منجبلك وهيك الطبقة السياسية عقدت قران لبنان على العجوز يلي بيسموها أم الفساد وصار الفساد إلو مرافقين ومؤيدين وقد ما فيكون كونو كذابين تتحصلو على نياشين
إذا مشيت بشوارع بيروت المظلمة شو بتحس يا ترى لح تحس قلبك حيطلع من محلو وممكن فجأة تروح عالدار الآخرة المواطن اللبناني المسكين سقط شهيدا جراء كمين سرقة وسلب مبكل
مين ممكن يتجرأ يتجول بلبنان بعد الساعة 12 بليل كتبوها بالقلم العريض الدولة مقصرة في إنارة لبنان يجب وضع حد لهذا الفلتان بي هالفترة الحرجة من عمر لبنان أي سائح ممكن يجي ويشوف سواد العاصمة بيروت بدون ما يقول : وفي الظلماء ما جربت نفسي ولكن مع خوفي أهرب كالغزال اليوم للأسف تسكر ملف السياحة وصارت دول أوروبا على وضعها مرتاحة لبنان عاصمة للثقافة العربية بس شو المقومات يلي ممكن ننهض فيها اذا كان ما في كهربا ولا مي ولا صيانة للمرافق ولا للطرقات او للدوائر الحكومية
ساعتها ابو العبد البيروتي لح يقلكن
ليكو هيدي البلد يلي بتفتخرو فيها كترت بلاويها حاميها حراميها والكيدون مكسور على جنبيها
صار البلد مهلهل عملو منو كبيس ومخلل دخلك امتين البلد بدو يوقف على إجريه
ابو العبد ما تنطر بعد بدنا كتير لنوقف وهيك صار البلد بحاجة لبصارة تتخيل الوضع بعد سنة أو سنتين وتحكي عن شي حل لمعاناتنا اليومية مع طبقة ودع هواك تخلت عن الإحساس وتمسح قلبها وصارت عايشة بكوكب بعيد عن قلوب اللبنانيين خليكون عايشين بعتمة انانيتكون بس لما منور قلوبنا بمحبة بعض بيسقط قناع الزيف والنفاق
