حوار بالعامية “نكهة بلدي بالتوفيق يا ولدي”
فقرات أسبوعية يكتبها الاعلامي جلال فيتروني
قربت استحقاقات البلدية توافقو على الإختيار الصح وكونو جديرين بالمهمات اللي حتتولوها لحتى نطلع سوا من دوامة التقصير والكيدية والمحاصصة يلي ما بتودي إلا للوطن المعلب على مصالح أهل السياسة
تابلو بلدي:
غيران عابلدي: يا جماعة قلبي لح يطير مبسوط وماشي أموري عالتمام أنا مرشح على عضوية البلدية وإذا نجحت بدي وزع كنافة ومهلبية
طامح فوق العادة: اه روق عحالك شوي شو مفتكرها أكلة مشاوي يا زميل البلدية حس بالمسؤولية مش وجاهة وشوفوني يا هو أنا مرشح عالمخترة صحيح واجباتنا تجاه وطنا مقصرة أكيد لح يبرم دولابك يا وطن ولاقي حالي بقلب المخترة
غيران عابلدي:بدك تشتغل عحالك لتصير سوبرمان زمانك وتعلى أسهم مشاريع نجاحك بلش ببرنامجك من هلق وطرحو عالناس وخليك على هالأساس
طامح فوق العادة: سماع مني هالخبرية قالو للبنان زعلان ليه !! ومين مزعلك قلهم كلهم سابوني وحيد واخدوا مصالحهم ونسيو تضحياتي ليهم حتى من غير كلمة حنودعك
غيران عابلدي: لاه هيك ما إلون حق هوي يلي جمعون عالمحبة وتركوه هيك
طامح فوق العادة: الوفا صار نادر بي هالايام والجحود بحق المدينة عم بيكسر الأحلام لا الصديق بيضل صديق ولا العدو ملك الزمان ما بتعرف كيف بتتبدل الأمور ومنصير كلنا على مبدأ A la Mor ( الحب)
غيران عابلدي: خلينا نحط ايدينا بإيد بعض ونبلش نجتهد لخدمة لبنان هوي املنا وشموخ جبلنا صفوا النوايا وطهروا القلوب وقولو يا رب عطيني من صوتك لأعطيك من صوتي وهيك منعيش الشراكة الحقيقية بغض النظر عن الطائفية والمذهبية
