نشرة صوتنا للمدى الفنية – 08 أكتوبر

حكاية نجاة الصغيرة اللي بدأت بحفلة ومقلب!

ودي حكاية جديدة من الزمن الجميل

تصدقوا إن نجاة الصغيرة، اللي بقت واحدة من أشهر وأهم نجمات الغناء في مصر والوطن العربي، بدأت حكايتها مع الجمهور بحفلة تذكرتها قرش صاغ واحد بس؟!

الحكاية بدأت في المنصورة، لما متعهد حفلات اسمه بكر قرر يعمل حفلة كبيرة في سينما فريال الصيفي بحي توريل، واتفق مع الأستاذ أنطون، المحامي وصاحب السينما.

المكان وقتها كان بسيط جدًا، شبه شادر صغير، لكن بكر كان عايز يعمل ليلة الناس تفضل فاكرها.

فقرر يعلن عن مفاجأة كبيرة:
المطربة نجاة هتغني في الحفلة!

وطبعًا الناس وقتها كانت عارفة المطربة نجاة علي صاحبة أغنية «فاكراك ومش هنساك»، فانتشر خبر الحفلة في المنصورة والقرى اللي حواليها بسرعة جدًا.

والأغرب إن بكر نزل يلف في شوارع المدينة بـ حنطور ويعلن عن الحفلة، وتذكرة الدخول كانت قرش صاغ واحد!

وجاء يوم الحفلة…

الدنيا اتقلبت زحمة، والرجالة والستات والأطفال جُم من كل مكان، والمكان اتملى عن آخره.

وفجأة، فتحت الستارة…

ظهرت فرقة موسيقية صغيرة، وبعدها دخلت بنت نحيفة صغيرة، عمرها حوالي 12 سنة!

رفع بكر الميكروفون وقال بكل ثقة:

«والآن تستمعون إلى المطربة نجاة!»

الناس بصت لبعضها…

وبدأ الاعتراض والصفير:

«فين نجاة؟! إحنا جايين نسمع نجاة علي!»

لكن بكر أشار للبنت الصغيرة وقال:

«هي دي نجاة… نجاة الصغيرة!»

وهنا بدأت المفاجأة الحقيقية…

البنت وقفت بثبات، وبدأت تغني مقطعًا من أغاني أم كلثوم، بصوت قوي جدًا ومختلف تمامًا عن سنها.

في البداية سكت الجمهور…

وبعدها حصلت اللحظة اللي محدش نسيها.

الناس بدأت تركز في صوت الطفلة، والتصفيق بدأ يعلى، وخيبة الأمل اتحولت لإعجاب وانبهار.

وفي نهاية الحفلة، قال واحد من الحاضرين وهو بيضحك:

«والله الحفلة دي تستاهل قرشين مش قرش واحد!»

ومن الليلة دي، بدأ اسم نجاة الصغيرة يلمع…

الطفلة اللي دخلت حفلة في المنصورة والناس فاكرين إنهم جايين يسمعوا مطربة تانية، خرجت من الحفلة وهي بتخط أول سطر في حكاية فنية كبيرة.

وبعد حوالي 20 سنة، وتحديدًا سنة 1961، رجعت نجاة للمنصورة مرة تانية، لكن المرة دي كانت الحكاية مختلفة تمامًا.

لم تعد الطفلة المجهولة اللي غنت قدام جمهور مستغرب…

رجعت وهي نجمة كبيرة، تستقبلها الجماهير بالورود والتصفيق في حفل «أضواء المدينة».

من قرش صاغ واحد بدأت الحكاية…

وإلى واحدة من أجمل وأهم أصوات الزمن الجميل وصلت نجاة الصغيرة. 🎶

حكاوي البشلاوي حكايات من الزمن الجميل، لما كان للصوت قيمة وللفن حكاية.

بديعة مصابني بعد رحيل نجيب الريحاني.. شيشة وذكريات على نفس الترابيزة

ودي حكاية جديدة من الزمن الجميل

الصورة دي مش مجرد صورة قديمة…

دي صورة فيها حكاية حب وذكريات وفراق.

بقالها أكتر من 77 سنة، وبتجمع الفنانة بديعة مصابني، زوجة الفنان الكبير نجيب الريحاني، وهي قاعدة في مقهى «فينكيس» الشهير في شارع عماد الدين، والشيشة قدامها، وكأنها سرحت بعيد عن دوشة المكان… ورجعت بذاكرتها لسنين فاتت.

بعد رحيل نجيب الريحاني، كانت بديعة بتحب تيجي للمقهى في الصباح، وتقعد على نفس الترابيزة اللي كانت بتجمعها بزوجها.

يمكن بالنسبة لأي حد كانت مجرد ترابيزة في قهوة…

لكن بالنسبة لها كانت مكان عاشت عليه أجمل لحظات عمرها، وشافت فيه نجيب قدامها، وسمعت كلامه وضحكته، وعاشت معاه تفاصيل يمكن الزمن أخدها، لكن الذكرى عمرها ما راحت.

والأجمل إن الترابيزة دي كانت شاهدة كمان على جانب مهم من تاريخ الفن المصري.

كان نجيب الريحاني ورفيق مشواره وصديقه بديع خيري يقعدوا عليها بالساعات، يتكلموا ويفكروا ويكتبوا، ومن جلساتهم خرجت أفكار وأعمال صنعت جزءًا كبيرًا من تاريخ الكوميديا المصرية.

يعني المكان اللي الناس كانت شايفاه مجرد قهوة في شارع عماد الدين، كان في الحقيقة واحد من الأماكن اللي اتولدت فيها أفكار ضحكت أجيال كاملة.

وبعد ما رحل الريحاني، فضلت بديعة ترجع لنفس المكان…

يمكن علشان المكان كان لسه موجود، لكن الشخص اللي كان بيملأه بالحياة اختفى.

يا ترى كانت بتبص للكرسي اللي قدامها وتفتكر أيامهم؟
ولا كانت بتسمع في صوت الشيشة ضحكة نجيب الريحاني؟

دي مش بس صورة من الزمن الجميل…

دي صورة بتقول لنا إن بعض الأماكن بتفضل عايشة في الذاكرة، حتى بعد ما أصحابها يرحلوا.

رحم الله نجيب الريحاني وبديع خيري، ورحم الله جيلًا كاملًا من الفنانين اللي خلّوا الضحكة فن، والذكريات حكايات ما بتموتش. 🎭❤️

لما الصورة القديمة تحكي حكاية أكبر من ألف كلمة.

نجيب_الريحاني بديعة_مصابني بديع_خيري الزمن_الجميل شارع_عماد_الدين حكاوي_البشلاوي

امير الشعراء. احمد بك شوقي و موسيقار الاجيال محمد عبدالوهاب. في صورة نادرة. جدا. عمرها يتخطي 90 عاما

بعد رحيل أمير الشعراء أحمد شوقي عام 1932، واصل محمد عبد الوهاب توسيع علاقاته داخل الوسط الثقافي المصري، من خلال صالون الأديبة روز اليوسف، كما ذكر في مذكراته. هناك، تعرف إلى نخبة الأدباء الكبار مثل العقاد والمازني، اللذين كانت خلافاتهما الأدبية مع شوقي تحرمه سابقًا من الاقتراب منهما.

ومع بزوغ نجمه كملحن ومطرب أول، وأحد أبرز رواد التجديد في الموسيقى العربية، توثقت علاقاته بالجيل الجديد من الشعراء في مصر والعالم العربي، مثل بشارة الخوري (الأخطل الصغير) في لبنان، وكامل الشناوي، وعلي محمود طه، ومحمود حسن إسماعيل، وصالح جودت، وصولًا إلى نزار قباني في سوريا.
ومن بين أصدقائه المقربين كان الشاعر أحمد رامي، رغم أن التعاون بينهما اقتصر على ثلاث قصائد فقط: على غصون البان، ونشيد العلم، وأيها الراقدون (من فيلم دموع الحب)، قبل أن يتحول تعاونهما إلى أعمال بالعامية المصرية.

وإذا تأملنا مسيرة عبد الوهاب الفنية، نجد أن القصيدة الغنائية كانت بوابة دخوله إلى عالم الاحتراف، إذ بدأ مشواره بأداء قصائد الشيخ سلامة حجازي مثل ويلاه ما حيلتي وأتيت فألفيتها ساهرة. كانت تلك القصائد جزءًا من عروضه مع فرقة عبد الرحمن رشدي، وشكلت المرحلة الأولى من رحلته نحو المجد الفني، حيث امتزج الشعر بالموسيقى ليولد فن خالد اسمه محمد عبد الوهاب

عن صفحة السيد البشلاوي