حوار بالعامية “قطبة مخفية وحركة منها عفوية”
فقرات أسبوعية يكتبها الاعلامي جلال فيتروني
بعد ما إنضم إبراهيم العبيد من لائحة حراس المدينة للائحة نسيج طرابلس وهيك صارو 12 لفريق و12 لفريق تاني بس اللعبة انلعبت من خلف الكواليس وفي عضو راح للمقلب التاني
وهيك دخلنا بمعادلة النص زايد واحد وكأنو صرنا بمرحلة الزكزكة السياسية وعلى قاعدة يا بتكون البلدية إلنا أو ممنوع تمشو على سهلنا
ممنوع بلدية طرابلس يكون فيها توافق التزموا الرؤية وبعدو النسيج الحسابات السياسية دخلت العمل البلدي وبدها ترسم الطريق لست سنين جايي
وين راح خيار الناس بالتغيير والأصوات اختفت عبر الأثير لا إعادة للإنتخابات والموديل المفصل بيمشي لو كان قصير
معقول تتغير العقلية الذهنية المستعرة بكلمة أنا وبس معقول تتخلص بلدية طرابلس من الكيدية والتشبيح ومنطق قوم زيح وسكروا عالبلد الهوا النقي وهبوب الريح
ممكن تسلم البلدية من التجاذبات وتتجاوز التحديات ونقول :
بلديات يا جماعة البلديات كونو ايد وحدة وبلاش عصبيات فكرو بمصلحة الوطن وخففو طلبيات
مش ضروري تسافرو كتير وتغيرو عربيات
المهم تكونو فريق يحكم بالحق ويلتزم أدبيات
تصبحون على بلدية اجمل
